Tirigsikan

Tigsik ko an kabikolan
Sa gayon asin sa yaman
saiyang dating ngaran, Tierra de Ibalon
An mga tawo Bikolano kun apudon.

Tigsik ko an mga ORAGON
asin Bikolanong magagayon
Sinda intirong mahiguson
Asin mga taong maogmahon.

Tigsik ko an Bulkang Mayon
Orgulyo kan intirong rehiyon
Sa Perfect cone shape kainiyo
Mamangha kang intiro.

 An Bicol Express tigsik ko man
Sa namit na amansiram
mahamis-hamis na maharang-harang
ikinabantog man kan intirong Kabikulan.

Tigsik ko man an mga butanding
Sa Sorsogon mo sinda mahihiling
Tigdarayo nin kadakulon na tawo
Mahiling lamang an mga iniyo.

Tigsik ko an abaka
Saro sa pinagkukunang kabuhayan ta
Dakul na bagay an digdi magigignibo
Asin ini pusog man talagang intiro.

Tigsik ko an Tiwi Hot Springs
Na sa Tiwi, Albay mahihiling
Bulong daa ini sa mga rayuma
Kaya digdi kumarigos ka na.

An Cam. Sur Water Sports Complex tigsik ko man
Kadakulon na turista baga an nagduduman
Kaya turismo sa rehiyon intiro man nabantog
Huli sa  pagpalakad kan gobyernong pusog.

Tigsik ko an Mount Isarog
na an sabi tubig daa an laog
Kaya oras na pumutok iniyo
Sarabi baga katapusan na nin mundo.

An mga Bikolana tigsik ko man
Sa kagayonan dae lamang daogan.
Sa mga beauty contest pirming nanggagana
Hilinga na sana si Venus Raj.

Tigsik ko an puntong ini na ako mapundo na
Ta ining tirigsikan amanlawig na baga
Dumigdi na sana kamo sa samong lugar
Ta nagsasabi ako nin totoo, saindo yan marerealisar.